මුසාව හෝ බොරුව
- hedigalle soratha thero
- Apr 16, 2017
- 2 min read
සමාජය ආශ්‍රය කරන සමාජය එක්ක ගැවසෙන උදවිය දන්නවා අද ලෝකය කියන්නේ කොච්චර අවුල් වියවුල් වලින් පිරිච්ච තැනක්ද කියල. මුසාව නැතිනම් බොරුව, බොරුව නිසා ඇතිවන රැවටීම මේ සමාජයේ ඇතිවෙන අවුල් බොහොමයකට වගකිවයුත්තෙක් වෙනවා. අද ලෝකය දිහා බැලුවොත් බාල මහලු භේදයක් නැතුව ජාති ආගම් භේදයක් නැතුව පන්ති භේද වලින් තොරව සියල්ලෝම බොරු හා බොරුව හා බැඳී පවතින රැවටීම පුරුදු කරමින් ඉන්නවා, එහිම යෙදෙමින් ඉන්නවා. අලුත් විදියට රැවටීමේ උපක්‍රම, අලුත් බොරු හොයාගන්න තමය් ගොඩක් අය උත්සහ කරන්නේ. කවර ආකාරයකින් හෝ මුසා බස් පවසන, එහෙම නැත්නම් ඒ හා බැඳුනු උපක්‍රම මගින් අනුන් රවටන පුද්ගලයා බුදුරජාණන් වහන්සේ දේශනා කල 4 වන ශික්ෂා පදය කඩකළ තැනැත්තෙක් ලෙසය් ගැනෙන්නේ.
බොරුව ප්‍රකාශ කරන්න පුළුවන් ආකාර දෙකක් පිළිබඳව බුදුදහමේ දැක්වෙනවා. පලවැන්න තමය් අසත්‍ය වචන යොදාගෙන වාචිකව මුසාබස් පැවසීම. බොරුව ප්‍රකාශ කරන්න පුළුවන් දෙවැනි ආකාරය තමය් තමන්ගේ ශරීරයේ අංග යොදාගෙන වාචික නොවන ආකාරයකට බොරුවක් ඇඟවීම. යම් පුද්ගලයෙකුට පුළුවන් සත්‍ය නොවන තොරතුරු ඇතුලත් කරලා ලියකියවිලි සකස් කරන්න. අනුන් රැවටීමේ අරමුණ ඇතිව ව්‍යාජ ලියවිලි අච්චු ගහන්න පුළුවන්. එමෙන්ම තමන්ගේ අත්සන හෝ වෙනයම් මුද්‍රාවක් භාවිත කරලා අසත්‍ය කරුණු අඩංගු ලියවිල්ලකට අනුමැතිය පලකිරීමේ ක්‍රියාවක යෙදෙන්නත් පුළුවන්. ඒ වගේම යම් යම් ශාරීරික අභිනයන් භාවිතා කරලත් බොරු කරන්න පුළුවන්. ඔලුව හෙලවීම, අත් සෙලවීම වගේ දේවල් වලිනුත් වෙනත් කෙනෙක් මුලා කරන උපදෙස් සපයන්න හැකියාව තියනවා. මේ කොය් ආකාරයෙන් සිදු කලත් එම ක්‍රියාවන් පසුව විපාක දීමේ බලාපොරොත්තුවෙන් එම පුද්ගලයාගේ කර්මයන් එක්ක
පෙලගහෙනවා. ඉඩ ලැබුණු වෙලාවක මහත් දුක් විපාක ඔහුට ලබාදෙනවා....
මුසාවාදයෙන් වැළකීමේ සිල් පදය කඩවෙන්න පුළුවන් අවස්ථා හතක් තියනවා ...
1. යමක් දැනගෙන නොදන්නා බවට ශපත කිරීමේ ක්‍රියාවන්
2. තමන් අසත්‍ය කරුණු පවසන අතර එම කරුණු සත්‍යම බවට කරන ශපත කිරීම්
3. තමන් වෙත නැති අධිමානසික බලයන් පිළිබඳව කරන ප්‍රකාශ
4. අන්‍යන් රැවටීමේ අරමුණ ඇතිව සිදුකරන රඟපෑම්.
(බොරු ලෙඩ ගැනීම්, අනුකම්පාව සඳහා දැඩි වේදනාවක් මවාගැනීම ....)
5. අනුන් රැවටීමේ අරමුණින් කරන වචන හරඹ.
(හිතාමතා සත්‍ය යටපත් කිරීමේ අරමුණ ඇතිව වචන හරඹ භාවිත කිරීමේ අවස්ථා. වචන හරඹය තාර්කිකව ගත් විට බොරුවක් නොවුනත්, අනුන් රැවටීමේ අභිප්‍රාය මෙහිදී අකුසල කර්මයක් සිදු කරනු ලබනවා )
6. යමක් පිලිබඳ අධිතක්සේරුවෙන් සිදුකරන ප්‍රකාශ.
(එක දෙක කරලා කීමේ ක්‍රියාවන් මේ යටතටය් ගැනෙන්නේ)
7. වැදගත් කරුනු සඟවමින් කරන ප්‍රකාශයන්.
(වාර්තාවක හෝ කථනයේදී අනුන් රැවටීමේ උවමනාව ඇතුව වෙදගත් කරුණු සැඟවීම හෝ හිතා මතා අතහැරීමක් සිදුකිරීමේ ක්‍රියාවන් මේ යටතටය් ගැනෙන්නේ)
මීට අමතරව දුර්විපාක ලබාදෙන ආකාරයට වචනය හසුරුවන්න පුළුවන් වෙනත් විධි ගැනත් බුදුදහමේ දැක්වෙනවා. මේවයින් මුසාවාද අකුසලය සිද්ධ නොව්නත් ක්‍රියාවට අනුරූප අකුසල විපාකයෙන් නම් ගැලවෙන්න ලැබෙන්නේ නෑ.
1. අනුන්ගේ සිත් පීඩාවට පත් වෙන අයුරින් වචන භාවිතා කිරීම.
(වඩාත්ම රිදෙන තැන් බලා ඉලක්ක කර වචන පැවසීම මේ යටතටය් ගැනෙන්නේ)
2. උපහාසාත්මක වචන පැවසීම.
(සොපහසය මුසු වචන, ඇනුම් පද යනාදිය වැටෙන්නේ මේ යටතටය්)
3. යමක් හෝ යමෙක් පහත් කිරීමේ අරමුණ ඇතුව පවසන වදන්
(ඉරිසියාව හෝ වෙනයම් හේතුවක් නිසා වෙනකෙකු පහත හෙලා කතා කිරීමේ ක්‍රියාවන් වැටෙන්නේ මේ ගණයට)
4. චපල වදන්
(හිතාමතා විශ්වාසය කඩ කිරීමේ අරමුණ ඇතුව පවසන වචන මේ ගනයටය් වැටෙන්නේ. අනික් පුද්ගලයා රැවටීමේ අභිප්‍රයක් මේ අවස්ථාවේ නැති උනත් අනිකා තමන් පිලිබඳ තැබූ විශ්වාසය බිඳ වැටෙන පරිදි හිතාමතා කතා කිරීමේ ක්‍රියාවන් මෙයට අයත් වෙනවා )
5. ප්‍රහාරාත්මක වචන භාවිතා කිරීම.
(යමෙකුට හෝ යමකට තදින් වචනයෙන් පහර දෙන අවස්ථා ඔබ දැකල ඇති. මෙම වචන වලින් බොරු කීමේ අකුසලය සිදු උනේ නැතත්, ඊට අනුරූප අකුසල විපාක ලැබෙනවා )
6 නොසැලකිලිමත් ලෙස සිදුකරන ප්‍රකාශ.
(දන්නා දෙයක් සම්භන්දයෙන් නොසැලකිලිමත් ලෙස ප්‍රකාශ සිදුකරන අවස්ථා වලදී මෙම අකුසලය සිද්ධ වෙනවා)
Comments